நவோதயா பள்ளிகள்: "எங்களுக்கு தேவையில்லை" – உச்ச நீதிமன்றத்தில் தமிழக அரசு திட்டவட்டம்

மத்திய அரசுடன் ஆலோசனை

இந்த விவகாரத்தில் உச்ச நீதிமன்றம், மத்திய அரசுடன் இணைந்து கலந்தாலோசித்து, ஆறு வார காலத்திற்குள் பள்ளிகளை அமைப்பதற்கான இடங்களைக் கண்டறிந்து நீதிமன்றத்தில் அறிக்கை சமர்ப்பிக்க வேண்டும் என்று தமிழக அரசுக்கு உத்தரவிட்டது. நீதிபதிகள் பி.வி. நாகரத்னா மற்றும் ஆர். மகாதேவன் அடங்கிய அமர்வு, "ஜவஹர் நவோதயா பள்ளிகள் விவகாரத்தை மொழிப் பிரச்சனையாக மாற்றக் கூடாது. நாம் கூட்டாட்சி அமைப்பில் வாழ்கிறோம். மாநில அரசின் மொழிக் கொள்கை இதுதான் என்று மத்திய அரசிடம் கூறுங்கள், அது குறித்து ஆலோசனை நடத்துங்கள்" என்று அறிவுறுத்தியது.

தமிழக அரசின் நிலைப்பாடு

தமிழக அரசு தாக்கல் செய்த பிரமாணப் பத்திரத்தில், "ஜவஹர் நவோதயா வித்யாலயா திட்டத்தின் அடிப்படையான மும்மொழி கொள்கை, தமிழக அரசு பின்பற்றும் இருமொழி கொள்கைக்கு முற்றிலும் எதிரானது. இத்திட்டத்தை அதன் தற்போதைய வடிவில் செயல்படுத்துவது, 2006-ம் ஆண்டின் தமிழ்நாடு தமிழ் கற்றல் சட்டத்தை மீறுவதாக அமையும்" என்று குறிப்பிட்டுள்ளது. மேலும், தமிழ்நாட்டில் ஏற்கனவே 38 மாதிரி உறைவிடப் பள்ளிகள் சிறப்பாக செயல்பட்டு வருவதாகவும், அவற்றுக்கு மத்திய அரசு நிதி வழங்க வேண்டும் என்றும் தமிழக அரசு கோரிக்கை விடுத்துள்ளது.

நிதிப் பிரச்சினை

தமிழக அரசு தனது பிரமாணப் பத்திரத்தில், சமக்ரா சிக்ஷா திட்டத்தின் கீழ் மத்திய அரசு வழங்க வேண்டிய நிதியை வழங்காமல் நிறுத்தி வைத்திருப்பதாகவும் குறிப்பிட்டுள்ளது. 2024-25 மற்றும் 2025-26 ஆண்டுகளுக்கு மொத்தம் ₹13,998.82 கோடி ஒதுக்கீடு செய்யப்பட்ட நிலையில், ₹450.60 கோடி மட்டுமே வழங்கப்பட்டுள்ளதாகவும், ₹3,548.22 கோடி நிலுவையில் உள்ளதாகவும் தமிழக அரசு தெரிவித்துள்ளது.

#NavodayaSchools #TamilNadu #SupremeCourt #TwoLanguagePolicy