சேலம் மாவட்டம் வாழப்பாடி அருகே போலி சாமியாராக செயல்பட்டு வந்த விஜயராஜ் (51) என்பவர், சிறுமிகள் மற்றும் பெண்களை பாலியல் ரீதியாக துன்புறுத்திய வழக்கில் போக்சோ சட்டத்தின் கீழ் கைது செய்யப்பட்டுள்ளார். வெள்ளாளகுண்டம் கிராமத்தைச் சேர்ந்த இவர், ஃபிரிட்ஜ், மிக்ஸி, கிரைண்டர் போன்ற மின் சாதனங்களை பழுது பார்க்கும் தொழில் செய்து வந்த நிலையில், 'சனீஸ்வரா பரிகார நிலையம்' என்ற பெயரில் போலியாக மாந்திரீக மையம் நடத்தி வந்ததாக போலீசார் தெரிவித்தனர்.
விநாயகர் சதுர்த்தி விழாவுக்கு நன்கொடை கேட்டு வந்த சிறுமி ஒருவரிடம் தகாத முறையில் நடந்துகொள்ள முயன்றபோது இந்த அதிர்ச்சி சம்பவம் அம்பலமானது. தப்பிச் சென்ற அந்தச் சிறுமி, தனது தோழிக்கு இதைத் தெரிவிக்க, அவரிடமும் இதேபோன்று நடந்துகொள்ள முயன்றதாக தெரியவந்தது. இதையடுத்து, சிறுமிகளின் பெற்றோரும் அப்பகுதி இளைஞர்களும் விஜயராஜின் பரிகார நிலையத்திற்குச் சென்று பூட்டை உடைத்து சோதனை நடத்தியபோது, அங்கு பள்ளி மாணவிகளின் சீருடைகள் இருந்ததைக் கண்டு அதிர்ச்சியடைந்தனர்.
மேலும், அங்கிருந்த லேப்டாப்பை சோதனை செய்தபோது, சிறுமிகள் மற்றும் பெண்களை ஆபாசமாக படம் பிடித்த 50க்கும் மேற்பட்ட வீடியோக்கள் இருப்பதைக் கண்டு மேலும் அதிர்ச்சியடைந்தனர். உடனடியாக காவல்துறையினருக்கு தகவல் அளிக்கப்பட்டு, வாழப்பாடி அனைத்து மகளிர் காவல் நிலைய போலீசார் விஜயராஜை கைது செய்து விசாரணை மேற்கொண்டனர்.
போலீசாரின் விசாரணையில், குறைந்தது 3 சிறுமிகளுக்கு பாலியல் தொல்லை அளித்ததும், பரிகார பூஜைக்கு வந்த பெண்களை ஆபாசமாக வீடியோ எடுத்து லேப்டாப்பில் பதிவு செய்து வைத்திருந்ததும் உறுதி செய்யப்பட்டது. கைது செய்யப்பட்ட விஜயராஜ், சேலம் போக்சோ சிறப்பு நீதிமன்றத்தில் ஆஜர்படுத்தப்பட்டு, சேலம் மத்திய சிறையில் அடைக்கப்பட்டுள்ளார்.
கருத்துகள் (0)
கலந்துரையாடலில் இணையுங்கள் — Join the discussion
கருத்து பதிவிட உள்நுழையவும் — log in