ஈரானில் அலி காமேனியின் இறுதி ஊர்வலம் – அமெரிக்கா மீது பழிவாங்கும் சபதம்; ஈரான்-ஈராக் எல்லையில் ஐஆர்ஜிசி மற்றும் குர்திஷ் போராளிகள் இடையே மோதல் – 7 பேர் உயிரிழப்பு

🔴 ரஷ்யாவின் அதிநவீன ஏஐ ட்ரோன் தாக்குதலால் உக்ரைனின் 20 எரிபொருள் நிலையங்கள் அழிப்பு – உக்ரைன் ராணுவ அதிகாரி மீது நார்ட் ஸ்ட்ரீம் குண்டுவெடிப்பு வழக்கில் ஜெர்மனி குற்றப்பத்திரிகை

ஈரானில் அலி காமேனியின் இறுதி ஊர்வலம் – அமெரிக்கா மீது பழிவாங்கும் சபதம்; ஈரான்-ஈராக் எல்லையில் ஐஆர்ஜிசி மற்றும் குர்திஷ் போராளிகள் இடையே மோதல் – 7 பேர் உயிரிழப்பு

இந்தியா-சீனா இடையிலான புதிய வணிக அனுமதி – 4 சீன மின் உபகரண நிறுவனங்களுக்கு அரசு ஒப்பந்தங்களில் பங்கேற்க இரு ஆண்டு விலக்கு

சென்னை, ஜூலை 3 – உக்ரைன் மீதான ரஷ்யாவின் தாக்குதல், ஈரானின் மறைந்த தலைவர் அலி காமேனியின் இறுதி ஊர்வலம், ஈரான்-ஈராக் எல்லையில் மோதல், இந்தியா-சீனா வணிக உறவுகளில் மாற்றம் மற்றும் இந்திய பருவமழை நிலவரம் குறித்த முக்கிய சர்வதேச செய்திகளின் தொகுப்பு இதுவாகும்.

ரஷ்யா இரண்டாவது நாளாக உக்ரைன் மீது கடுமையான தாக்குதலை நடத்தியுள்ளது. குறிப்பாக உக்ரைனின் சமி (Sumy), கார்கிவ் (Kharkiv), டினிப்ரோ (Dnipro), மைக்கோலைவ் (Mykolaiv) மற்றும் செர்னிஹிவ் (Chernihiv) பகுதிகளில் உள்ள மொத்தம் 20 எரிபொருள் மற்றும் எரிவாயு நிலையங்களை ரஷ்யா குறிவைத்து அழித்துள்ளது.

இத்தாக்குதலில் ரஷ்யா முதன்முறையாக மனிதக் கட்டுப்பாடின்றி இயங்கும் 'ஏஐ பவர்டு ட்ரோன்களை' பயன்படுத்தியுள்ளது. இந்த ட்ரோன்கள் உக்ரைனின் ஜாமர்கள் இருக்கும் இடங்களை ஆட்டோமேட்டிக்காகக் கண்டறிந்து, அவற்றையே நேரடியாகத் தாக்கி அழிக்கும் திறன் கொண்டவை. கடந்த மூன்று நாட்களாக இந்த அதிநவீன ட்ரோன்களை உக்ரைன் ராணுவத்தால் இடைமறிக்கவோ அல்லது ஜாம் செய்யவோ முடியவில்லை.

உக்ரைன் தரப்பு, ரஷ்யாவின் எண்ணெய் சுத்திகரிப்பு திறனில் கால் பகுதியை முடக்கியுள்ளதாக தெரிவித்துள்ளது. அதே நேரத்தில், உக்ரைன் தனது நீண்ட தூர ட்ரோன் பிரச்சாரத்தை விரிவுபடுத்தி, ரஷ்யாவிற்குள் ஆழமான புதிய தாக்குதல்களை நடத்தி வருவதாக ஜெலென்ஸ்கி தெரிவித்துள்ளார்.

நார்ட் ஸ்ட்ரீம் பைப்லைன் வழக்கு: கடந்த 2022-ஆம் ஆண்டு நார்ட் ஸ்ட்ரீம் பைப்லைனைத் தகர்த்த தாக்குதலின் பின்னணியில் உக்ரைன் ராணுவ அதிகாரிகள் இருந்தது தற்போது அம்பலமாகியுள்ளது. இது தொடர்பாக உக்ரைன் ராணுவ அதிகாரி 'செர்கி கே' (Serhii K.) மீது ஜெர்மனி நீதிமன்றத்தில் குற்றப்பத்திரிக்கை தாக்கல் செய்யப்பட்டுள்ளது. இவர் கடந்த 2025 ஆகஸ்ட் மாதம் இத்தாலியில் கைது செய்யப்பட்டு, ஜெர்மனிக்கு ஒப்படைக்கப்பட்டார். 2026 இலையுதிர்காலத்தில் இவரது விசாரணை நடைபெறவுள்ளது.

உயிரிழப்பு விவரங்கள்: இந்த ஆண்டின் தொடக்கத்திலிருந்து (ஜனவரி முதல் ஜூலை வரை) உக்ரைன் தரப்பில் 20,534 வீரர்களின் உடல்கள் மீட்கப்பட்டுள்ளன, ஆனால் ரஷ்யாவிடம் இருந்து வெறும் 627 உடல்கள் மட்டுமே உக்ரைனுக்குத் திருப்பித் தரப்பட்டுள்ளன.

மறைந்த ஈரான் தலைவர் அலி காமேனியின் இறுதி ஊர்வலச் சடங்குகள் ஜூலை 3 முதல் ஜூலை 9 வரை திட்டமிடப்பட்டுள்ளன. ஜூலை 3 அன்று வெளிநாட்டுத் தலைவர்களுக்கான அதிகாரப்பூர்வ அஞ்சலியும், ஜூலை 4 மற்றும் 5-ல் பொது மக்கள் அஞ்சலியும் நடைபெறுகின்றன. ஜூலை 6 அன்று தெஹ்ரானில் இறுதி ஊர்வலம் நடைபெறவுள்ளது. அன்று தெஹ்ரானின் வான்வெளி மூடப்படும். ஜூலை 7 அன்று கும் (Qom) பகுதியிலும், ஜூலை 8 அன்று ஈராக்கின் நஜாஃப் மற்றும் கர்பலா பகுதிகளிலும் நிகழ்வுகள் நடைபெற்று, ஜூலை 9 அன்று அவரது சொந்த ஊரான மஷாத்தில் அடக்கம் செய்யப்படவுள்ளது. 100 க்கும் மேற்பட்ட நாடுகளின் பிரதிநிதிகள் கலந்து கொள்கின்றனர்.

இந்த இறுதி ஊர்வலத்திற்கு ஐரோப்பிய நாடுகள், அமெரிக்கா மற்றும் இஸ்ரேல் ஆகிய நாடுகளுக்கு அழைப்பு விடுக்கப்படவில்லை. எனினும், சவுதி அரேபியா, பாகிஸ்தான், ரஷ்யா மற்றும் இந்தியாவின் மதகுருக்கள் இதில் பங்கேற்றுள்ளனர். அலி காமேனியின் மரணத்திற்கு அமெரிக்காவையும் இஸ்ரேலையும் பழிவாங்குவோம் என ஈரானின் நாடாளுமன்ற சபாநாயகர் காலிபாப் மற்றும் ராணுவத் தளபதிகள் சபதம் செய்துள்ளனர்.

ஈராக்-ஈரான் எல்லையில் மோதல்: ஜூன் மாதத்தின் பிற்பகுதியிலும், ஜூலை மாத தொடக்கத்திலும், மேற்கு ஈரானின் குர்திஸ்தான் பகுதியில் ஐஆர்ஜிசி (IRGC) மற்றும் குர்திஷ் பிரிவினைவாத குழுக்களுக்கு இடையே மோதல்கள் தீவிரமடைந்துள்ளன. பிரிவினைவாத குழுவான PDKI இன் 6 போராளிகள் உயிரிழந்துள்ளனர். மேலும், எர்பில் மற்றும் சுலைமானியா பகுதிகளில் ஈரானின் ஐஆர்ஜிசி ட்ரோன் மற்றும் ஏவுகணை தாக்குதல்களை நடத்தியுள்ளது.

2020 எல்லை மோதலுக்குப் பிறகு சீன நிறுவனங்களுக்கு விதிக்கப்பட்ட மின்சாரத் துறை சார்ந்த வணிகத் தடைகளை இந்தியா தளர்த்தியுள்ளது. இந்தியாவின் மின் உபகரண தேவைகளுக்காக டிபிஏ எனர்ஜி (TBEA Energy), நான்ஜியாங் எலக்ட்ரிக் (Nanjing Electric), நியூ நார்த் ஈஸ்ட் எலக்ட்ரிக் (New Northeast Electric) மற்றும் டாய்க்கா எலக்ட்ரிக் (Taika Electric) ஆகிய நான்கு சீன நிறுவனங்களுக்கு மத்திய நிதி அமைச்சகம் அதிகாரப்பூர்வமாக இரு ஆண்டு விலக்கு அளித்துள்ளது. இந்த நிறுவனங்கள் இந்தியாவில் உற்பத்தி வசதிகளைக் கொண்டுள்ளன. இந்த நடவடிக்கை, மின் உபகரண பங்குகளில் வீழ்ச்சிக்கு காரணமாக அமைந்துள்ளது.

பசிபிக் பெருங்கடலை வெப்பமாக்கும் எல் நினோ (El Nino) தொடங்கியுள்ள போதிலும், இந்த ஆண்டு இந்தியாவில் கடுமையான வறட்சி இருக்காது என்றும், மாறாக மிகக் கடுமையான மழைப்பொழிவு இருக்கும் என்றும் கணிக்கப்பட்டுள்ளது. இருப்பினும், இந்திய வானிலை ஆய்வு மையம் (IMD) ஜூலை மாதத்தில் இயல்பை விட குறைந்த மழைப்பொழிவு இருக்கும் என்று கணித்துள்ளது. 1971-2020 காலகட்டத்தின் சராசரி மழையளவில் 94 சதவீதம் மட்டுமே ஜூலையில் பெய்யும் என்று எதிர்பார்க்கப்படுகிறது.

website : https://news.karuppu.in/

X (Twitter): https://x.com/karuppuTv

Facebook: https://www.facebook.com/karuppuezhutthu

Whatsapp: https://whatsapp.com/channel/0029Vb85Sj9CcW4sZ5D8qf37

#ரஷ்யா #உக்ரைன் #ஈரான் #அலிகாமேனி #இந்தியா #சீனா #கருப்புநியூஸ்

#Russia #Ukraine #Iran #AliKhamenei #India #China #KaruppuNews